Устудьуоннар улуус баһылыгын кытары көрсөр санаалаахтар

впк студ 6
студ 6
студ.1
студ-5
студ-5
Фото: ysia.ru

Бүлүү куорат тэбэр сүрэҕэ буолбут, үгүс учуутал, иитээччи идэлээхтэри, эбии үөрэхтээһин уһуйааччытын иитэн-үөрэтэн, такайан, олох киэҥ аартыгар таһаарбыт кырдьаҕас үөрэх кыһата – Н.Г.Чернышевскай аатынан Бүлүүтээҕи педагогическай колледж Устудьуон күнүн үрдүк таһымнаахтык бэлиэтээтэ.

Тэрээһин өрөспүүбүлүкэ үрдүнэн биллэриллибит Ыччат сылын үөрүүлээхтик арыйыынан саҕаланна. Үөһээ Бүлүү улууһун аатыттан СӨ Общественнай палататын «Билии» уопсастыба бэрэссэдээтэлэ Петр Николаев уонна ХИФУ историяҕа факультетын аатыттан Айтал Яковлев эҕэрдэ тыллаах ыалдьыттаатылар. Ону тэҥэ Бүлүү улууһун ыччат отделын салайааччы Николай Харлампьев , педколледж директорын эбээһинэһин толорооччу Александра Тутукарова , студпрофком бэрэссэдээтэлэ Антон Михайлов эҕэрдэлэрин тириэртилэр, үөрэххэ, үлэҕэ көхтөөх устудьуоннарга махтал суруктары туттардылар.

Салгыы устудьуоннар уонна эдэр учууталлар дьыалабыай оонньууга бастыҥы быһаардылар. Маныаха Хампа орто оскуолатын уонна Бүлүүтээҕи гимназия холбоһуктаах хамаандата — бастакы, Чернышевскай орто оскуолата – иккис, Тааһаҕар орто оскуолатын учууталлара үһүс бириистээх миэстэлэргэ тигистилэр. Оттон устудьуоннар хамаандалара миэстэҕэ тиксибэтэҕин да иһин, учууталлары кытары күрэстэһэн, эбии үөрүйэхтэннилэр. Устудьуоннар бырааһынньыктарын тэрийээччи, айар-тутар талааннаах ыччаты көҕүлүүр «Стимул» киин салайааччыта Светлана Мытник ыҥырыытынан үҥкүүлээх-битиилээх дьоро киэһэни эстрада ырыаһыта Айгылаан бэйэтин ырыатынан-тойугунан киэргэттэ. Олохсуйбут үгэһинэн, дириэктэр аатыттан бэлэх быһыытынан улахан тордунан кэлбит ыалдьыттары, хас биирдии устудьуону күндүлээтилэр.

Бу күн Үөһээ Бүлүү уонна Кэбээйи улууһун делегациялара устудьуоннары кытта көрүстүлэр. Педколледжка Ксения Семенова салайааччылаах кырдьаҕас Кэбээйи улууһун түмсүүтэ, Мукучу нэһилиэгин дьаһалтатыттан 7 киһилээх кэлбит делегацияны уонна ыалдьыттары дойдутун соботун сиэдэрэйдээн буһарбыт маанылаах остуолун тула түмтэ. Манна Кэбээйиттэн 14 устудьуон үөрэнэрин, 5 оҕо быйыл түмүктээн орто үөрэҕи туоһулуур диплому тутуохтаахтарын туһунан билиһиннэрдэ.

Онтон Үөһээ Бүлүү улууһуттан манна 100-чэкэ устудьуон үөрэнэр. 47 оҕо уопсайга олорор. Үчүгэй үөрэхтээх устудьуоннар стипендиялара 1800 солкуобай, оттон туйгуннар ый ахсын 2000 солк. ылаллар. Ону таһынан оҕолоох аҥардас ийэ устудьуон кыргыттарга сылга биирдэ көмө харчы көрүллэр. Итиэннэ сылга биирдэ дойдуларыгар кэлэр-барар ороскуоту (биир сырыыны) билиэтинэн отчуоттаатахтарына, төлөнөр. Толору хааччыллыылаах уопсайга олорор иһин сыллааҕы төлөбүр 3,5 тыһ. солк. тэҥнэһэр. Остолобуойга аһыылларыгар анаан, анал ыспыраапка туттардахтарына, ый аайы 1600 солк. көрүллэр. Бу харчы кыратык тиийбэт да буоллар, биллэр көмө буоларын оҕолор этэллэр.

Бүлүүгэ үөрэнэр үөһээ бүлүүлэр түмсүүлэрин Дүллүкүттэн сылдьар Валерия Чоросова салайар. Кини адаптивнай физкультура учууталларын бэлэмниир салааҕа үөрэнэр. Улуустааҕы ыччат отделын кытары быһаччы үлэлэһэр баҕалааҕын туһунан кэпсиир:

Ыччат отделын көмөтүнэн улууспут нэһилиэктэринэн сылдьан колледжка үөрэнэ кэлиҥ диэн ыччаты ыҥырар сыаллаах гастроллуохпутун баҕалаахпыт. Көрсүһүүлэри тэрийэргэ, онно ыраах сытар нэһилиэктэри кытта хабарга сорунабыт. Колледжка үөрэнэргэ, олорорго усулуобуйа барыта баар. Хас секция аайы душ, туалет үлэлиир. Секция иккилии хостоох, хостор 2,3,4,5,6 миэстэлээхтэр. Курдары сылдьар буолан, үөрэххэ тахсарга да чэпчэки. Кыһыҥҥы тымныыны билбэккэ аһаран эрэбит. Үөрэтэллэрэ үчүгэй, 9-с кылаас кэннэ киирии эмиэ баар. Нэһилиэктэртэн саамай элбэх биһиги, дүллүкүлэр (күлэр). Быйыл түмсүүбүт үлэтин сэргэхтик саҕалаатыбыт. Сотору кэминэн редколлегия саҥа састааба үлэлээтэҕинэ, сонуннарбытын улууспут хаһыатыгар тиһиктээхтик ыыта туруохпут.

Василий Петров Валерия Чоросова салайар үлэтигэр көмөлөһөр тутаах киһи. Кини Ороһуттан сылдьар, алын кылаас учууталларын бэлэмниир салааҕа үөрэнэр. Биир сыл үөрэнэн баран армияҕа сулууспалаан кэлбит. Уссурийскай куоракка ВДВ чааһыгар сулууспалаабыт, кэлэрин кытта уопсай профкомун бэрэссэдээтэлинэн талбыттар.

Бүлүү-Үөһээ Бүлүү хайысханан өрөбүллэргэ автобус сылдьара буоллар диэн баҕарабыт. Армияҕа бииргэ сулууспалаабыт табаарыспын кытта кэпсэтэн, устудьуоннары 350 солк. төлөөн сылдьалларын курдук үлэ ыыта сылдьабын. Маныаха улуус өттүттэн төлөбүргэ көмө көрүллэрэ буоллар, устудьуоннар чэпчэки сыананан сылдьыахтар этэ. Ону таһынан, Үөһээ Бүлүү устудьуоннара бэйэбитин көрдөрө араас тэрээһиннэргэ кыттарбытыгар, улуустарынан, нэһилиэктэринэн сылдьарбытыгар эмиэ айан өттүгэр улуустан көмө баара буоллар диэн баҕа санаалаахпыт.

Евдокия Чоросова эмиэ Дүллүкү. Быйыл саҥа үөрэнэ киирбит диэтэххэ, номнуо «Молодая гвардия» ыччат хамсааһынын Бүлүүтээҕи салаатын чилиэнэ буолан, Дьокуускайга ыытыллыбыт «Серебряный бал молодежи» кыттыбыт. Өрөспүүбүлүкэ лидер ыччаттарын кытары билсиспититтэн үөрэр.

Улууспут устудьуоннара эһиилги устудьуон күнүгэр улуус баһылыгын Владимир Поскачины кытта көрсүһэр баҕалаахтар. Итиэннэ бэйэлэрин тустарыгар кыһалҕалаах ыйытыыларын олохтоох хаһыат нөҥүө хоруй ылаары биэрдилэр. Сүрүннээн үөрэхтэрин бүтэрдэхтэринэ дойдуларыгар үлэлии кэлэр баҕалаахтарын, онно үлэ миэстэтин ыйыталастылар. Адаптивнай физкультура салаатын бүтэрэр устудьуоннар улууска коррекционнай оскуола арыллыа дуо диэн интэриэһиргииллэр. Былырыыҥҥы көрсүһүүгэ улуус баһылыгын солбуйааччы Спиридон Борбуев Бүлүү-Үөһээ Бүлүү хайысханан автобус сырыытын хааччыйар туһунан этиитэ хаһан быһаарыллыаҕын туоһуластылар. Төрөппүтэ суох хаалбыт тулаайах оҕолорго улуустан ханнык эмэ көмө көрүллүөҕүн, ону сэргэ активист, лидер, туйгун үөрэхтээх устудьуоннарга улуус дьаһалтатын аатыттан, ону тэҥэ улуус киэн туттар дьонун аатынан стипендия олохтоноругар этии киллэрдилэр. 20-с Манчаары оонньууларын спартакиадатыгар бэйэлэрин сэмэй кылааттарын киллэрсэр туһуттан, оонньуулар ыытыллар кэмнэригэр бары тутуспутунан волонтердуур баҕалаахтарын биллэрдилэр.

Наадаларын этэр, баҕаларын туруорсар сытыы-хотуу санаалаах улууспут ыччаттара Бүлүүтээҕи педколледж оргуйар олоҕун үөһүгэр сылдьалларын көрөн, билсэн олуһун үөрдүм. Айар-тутар, үлэлиир-хамсыыр баҕалаах ыччаттарбыт ыйытыыларыгар улуус баһылыгын хоруйа хайаан да тахсыаҕар эрэннэрэбин.

1 из 6
 
По теме
Спасатели выехали на участки возможного схода снежных лавин - ИА SakhaLife.Ru Спасатели аэромобильного поисково-спасательного подразделения Службы спасения республики 28 марта выехали из Якутска в Томпонский район для обеспечения безопасности на участках возможного схода снежных масс.
ИА SakhaLife.Ru
4.jpg - Мирнинский район В 2023 году на территории Якутия зарегистрировано 123 дорожно-транспортных происшествия с участием несовершеннолетних, в результате которых 1 ребенок погиб, 139 детей получили травмы.
Мирнинский район
В медицинскую часть исправительной колонии № 1 поступило новое медицинское оборудование - УФСИН России по Республике Саха (Якутия) В рамках модернизации филиалов медико-санитарной части № 14 ФСИН России, расположенных в исправительных учреждениях УФСИН России по Республике Саха (Якутия),
УФСИН России по Республике Саха (Якутия)