Былыр-былыргыттан саха омугар уус дьон өрүүтүн ытыктабылга сылдьар. Тимири уһааран игин араас оҥоһуктары, үлэ тэриллэрин оҥорор буоланнар саха омук сайдыытыгар суолталара олус улахан. edersaas.ru
Ити курдук, уус идэтэ Сахабыт сиригэр үүнэ-сайда турарын туһугар, быйыл Мирнэй оройуонугар буолар Ыччат ыһыаҕар «Эдэр тимир ууһа» диэн конкурс ыытыллыаҕа. Былырыын бу күрэхтэһии уопсай куонкуруска киирбэт буоллаҕына, быйылгы ыһыах биир сүрүн күрэхтэһиитинэн буолуоҕа.
Күрэхтэһии икки түһүмэхтээх. Кыттааччылар быһахтарын эрдэттэн оҥостон кэлэллэр. Ону дьүүллүүр сүбэ биир эмит күүстээх мадьыныны ыҥыран баран ол оҥоһуктарын тургутан көрөллөр. Дьэ онно хаппыт маһы кыһан, боолдьоҕу уонна кумааҕыны быһан саамай тулуурдаах, кылаана алдьамматах быһах бастыҥ аатын сүгүөҕэ.
Быйылгы күрэхтэһиигэ бастаабыт ууска МР-155 саа, иккис миэстэ буолбукка быһах сытыылыыр станок уонна үһүс миэстэҕэ тиксибиккэ уһанар инструменнары туттарыахтара. Билиҥҥи туругунан күрэхтэһиигэ 20-тэн тахса киһи сайаапка биэрдэ. Дьэ, онон бастыҥ уус аатын сүгэр иһин кытаанах киирсиилэри күүтэбит.
Ааптар: Сандал Никаноров «Саха Сирэ» хаһыат, edersaas.ru