Саха уопутун биһирээтилэр

Саха уопутун биһирээтилэр
Фото: iltumen.ru
Тыа сиригэр оскуола баар – олох баар, күөстүү оргуйар. Тыабыт сирэ аһатан-таҥыннаран олорор буоллаҕа, бүтүн өрөспүүбүлүкэни, дойдуну. Киэн туттар учуонайдарбыт, суруйааччыларбыт, айар куттаах интеллигенциябыт, биллэр производственниктарбыт бука бары тыа сириттэн силистээхтэр-мутуктаахтар.   Тыа сирин оскуолата — бүтүн нэһилиэк, улуус эргийэр киинэ. Онон, тыа сиригэр үлэлиир бэйэтэ уратылардаах, уустуктардаах, кыһалҕалардаах даҕаны, үчүгэйэ баһылыыр күүстээх өрүттэрдээх даҕаны…   Соторутааҕыта СӨ үөрэҕин миниистирэ Феодосия Габышева Чебоксары куоракка буолан ааспыт Российскай Федерация тыатын сирин учууталларын уочараттаах III съезтэрин делегаттарын кытта көрүстэ.   — Чуолаан кэпсиирдээх, көрдөрөрдөөх оскуолалар III съезкэ барбыттара, бу сүрүннээн өрөспүүбүлүкэ агро-оскуолаларын дириэктэрдэрэ, учууталлара. Кинилэр съезд пленарнай чааһыгар, дискуссионнай былассааккаларыгар көхтөөхтүк кыттан, тыа сирин оскуолаларын сайыннарыы кыһалҕаларыгар дьоһуннаах иһитиннэриилэри оҥорон, этиилэри киллэрэн кэллилэр, — диэтэ Феодосия Васильевна .   Ол курдук, Саха сириттэн Үөрэх министиэристибэтин кылаабынай исписэлииһэ Марина Сивцева салайааччылаах уон киһилээх делегация съезд үлэтин кэмигэр 5 дискуссионнай былассааккаларынан, Саха сиригэр тыа сирин оскуолатын сайдыытын хаамыытын уонна кыһалҕаларын туһунан дириҥ ис хоһоонноох иһитиннэриилэри оҥордулар, резолюцияҕа бэйэлэрин этиилэрин киллэрдилэр.   — Улахан делегациянан барбыппыт үчүгэйэ диэн – боппуруостары барытын хаптыбыт. Съезкэ, тыа оскуолатын үөрэҕин хаачыстыбатын хайдах үрдэтэр туһунан, Бүтүн Россиятааҕы оҕо хамсааһынын сайыннарыы, оҕону үлэнэн иитиини хайдах тупсарабытый, диэн, о.д.а. боппуруостары көрдүбүт. Ону таһынан, РФ үөрэҕин уонна наукатын миниистирэ Ольга Васильева этиитин эт кулгаахпытынан истэн, ыйытыы биэрэн, хоруй ылан, олус астынан кэллибит.   Холобур, Уус Алдан улууһун Тулуна орто оскуолатын дириэктэрэ, делегат Федот Дмитриевич Бысыин тыа сирин оскуолаларын автотырааныспарынан хааччыйыыга миниистиргэ ыйытыы биэрдэ уонна Арктическай оскуолалар уратыларын учуоттуулларыгар көрдөстө. Уонна, аныгыскы, IV съеһи Саха сиригэр ыытарга этии киллэрбитин, миниистир Ольга Васильева , бу боппуруоһу сиһилии үөрэтэн көрөн баран, быһаарыахтарын туһунан эттэ, — диэтэ Марина Васильевна .   Көрсүһүүгэ Тулагы агро-оскуолатын дириэктэрэ Изабелла Иванова пленарнай чааска тыл эппитин, үлэ лааҕырдарын нормативтарын ылынар уолдьаспытыгар делегаттар, салалта болҕомтотун туһаайбытын, биһиги өрөспүүбүлүкэбит тыа сиригэр эдэр учууталлары олохсутууга үлэтин уопутун билиһиннэрбитин, маныаха, тыа сиригэр үлэлиир эдэр учууталлар олорор дьиэҕэ сертификат ылалларын делегаттар сэргээн, резолюцияҕа эбии киллэртэрбиттэрин туһунан иһитиннэрдэ.   Оттон Амма улууһун Абаҕа агро-оскуолатын дириэктэрэ Людмила Александрова , Саха Өрөспүүбүлүкэтигэр агро-оскуолалар судаарыстыбаннай өйөбүлү ылыыларын уопутун, бу хайысханан ситимнээх үлэ биһиэхэ өссө 1992 сылтан сайдан иһэрин туһунан кэпсээбитэ съезд делегаттарын улахан интэриэһин тарпытын иһитиннэрдэ.   Саха сирин делегацията маны таһынан Краснодарскай кыраай Новолеушковскай станицатыгар ыытыллыбыт улахан научнай-методическай семинарга кыттыбытын, уопут атастаспытын билиһиннэрдэ.   Татьяна Маркова   Суруйуу төрүтэ «Саха Сирэ» хаһыат сайта: http://sakha-sire.ru  
 
По теме
По поручению прокуратуры республики прокуратура г. Якутска провела проверку по размещенной в сети «Интернет» информации о недостаточном оснащении ГАУ РС (Я) «Поликлиника № 1» медицинскими изделиями.
28 марта состоялась рабочая встреча главы Якутии с ректором АНО "Университет Национальной технологической инициативы 2035", генеральным директором Фонда поддержки проектов Национальной технологической инициативы Вадимом Медведевым,
ГТРК Саха
4.jpg - Мирнинский район В 2023 году на территории Якутия зарегистрировано 123 дорожно-транспортных происшествия с участием несовершеннолетних, в результате которых 1 ребенок погиб, 139 детей получили травмы.
Мирнинский район
Фотофакт: Историк Пантелеймон Петров на открытии выставки со своей первой учительницей - ИА SakhaLife.Ru Кандидат исторических наук Пантелеймон ПЕТРОВ со своей первой учительницей Варварой Сергеевной ЗВЕРЕВОЙ на открытии своей выставки, посвященной 75-летию учёного, эксперта по истории города Якутска.
ИА SakhaLife.Ru