Мэҥэлэр уус сылын уруйдууллар

Уус 1
уус 4
уус 3
уус 7
уус 8
Фото: ysia.ru

2017 сыл – илиилэринэн тутан-хабан, таптайан, чочуйан, уһанан, иистэнэн, оҥорор таһаарар идэтийбит дьону өйүүр сыалтан, Мэҥэ Хаҥалас улууһугар култуура эйгэтигэр уус сыла биллэриллибитин олохтоохтор улаханнык сэргээтилэр.

Саха омугу өбүгэ саҕаттан үс күүс ситимниир: ойууннааһын, тыл күүһэ уонна уус кыаҕа. Билиҥҥи сайдыылаах олоххо ити күүстэр кыахтарын, күүстэрин сүтэрбэккэ аныгы идэлэринэн солбуллан саха омук баарын тухары туһалыы сырыттахтара. Онуоха биһиги улууспут былыр-былыргыттан мындыр өйдөөхтөрүнэн, уран уустарынан тутахсыйбатах улуус буоларынан үөрдэр.

Мэҥэҕэ ойуулуур-дьүhүннүүр, норуот уус-уран оҥоһуктарын умсугуйан туран дьарыктанар дьон үгүстэр. Ол курдук хас нэhилиэк аайыттан холбоон сыллата ыытыллар култуура уонна спорт эстафетатыгар ортотунан 400 киhи кыттар. Саха таҥаhын биир бастакынан аар-саарга аатырдыбыт Скрябина Анна Прокопьевнаны, хомус ууhун Гоголев Семен Иннокентьевиhы, дэгиттэр талааннаах ууhу Бродников Афанасий Викторовиhы биир дойдулаахтара киэн тутта ааттыыллар. Кинилэр дьиҥнээх айылҕаттан айдарыллыбыт талааннарынан сөхтөрбүттэрэ. Сыл аайы үгэскэ кубулуйбут «Мэҥэ уус», «Сатал» быыстапкалар, республика маастардарын уhуйаан семинардара, маастар кылаастар ыытыллан эдэр уустары элбэххэ, саҥаҕа үөрэтэ улуус маастардарын үйэтитэр сыалтан «Өбүгэ мындыр дьарыгын сүппэт тыына» диэн кинигэ таhаартарбыттар.

Күн бүгүн Мэҥэ Хаҥалас улууһугар барыта 12 СӨ норуотун маастара үүнэн таҕыста, 16 СӨ уус – уран оҥоһуктарын маастара айа тута сылдьаллар. Оройуон таһымнаах норуот маастарын аатын 119 киһи сүгэр.

Евдокия Иванова «Олоҥхо дьиэтин» директора:

— Норуот маастардарын кытта «Олоҥхо дьиэтэ» норуот айымньытын киинин кэлэктиибэ утумнаахтык былааннаахтык үлэлэһэр. Улууспут маастардарын, айар талааннаахтарын түмсүүтүн уопсай мунньахха сүбэлэһэн уларытан «Мэҥэ Уус» диэн ааттаатыбыт. Күн бүгүн аҕа саастаах көлүөэҕэ СӨ норуотун маастардарын Төҥүлүттэн удьурҕайтан туттар тэрили, иһити – хомуоһу оҥорор Михаил Ильич Попов тимир уустара Устин Николаевич Борисов, Дмитрий Петрович Попов, Майаттан көмүс ууһа Егор Егорович Егоров – Үрүҥ Уус, туой маастара Петр Петрович Егоров, Тумултан сиэлинэн-кылынан өрөр Тамара Федоровна Рахлеева уо.д.а. ааттарын киэн тутта бэлиэтиибит. Эдэрдэргэ Майаттан тимир ууһа Егор Валерьевич Романов, Мэлдьэхситтэн туоһунан уонна куукулалары оҥоруунан киэҥник биллибит эдэр маастар Василий Андреевич Андросов уонна элбэх айар талааннаахтарбытынан, уустарбытынан, норуоттан тахсыбыт маастардарбытынан киэн туттабыт. Кинилэр үлэлэрэ төрөөбүт улуустарын оруолун, суолтатын үрдэтэр бренд буолар.

Тамара Рахлеева , сиэлинэн, кылынан оҥорор маастар, Доллу нэһилиэгэ:

— Биэнсийэҕэ тахсан дьиэбэр олоробун. Дьарыгым диэн туоһунан, кылынан, сиэлинэн үлэлэр. Араас быыстапкаларга кыттабын. Дьокуускайга Өксөкүлээх Өлөксөй аатынан норуоттар доҕордоһууларын дьиэтигэр «Симэх» норуот уус-уран оҥоһуктарын киинигэр дьарыктарга сылдьабын. Оройуоммут нэһилиэктэрин кэрийэн маастар-кылаастары ыытабын. Аҕыс киһилээх түмсүүлээхпин. Кыргыттарым улуустааҕы култуура уонна спорт эстэпиэтэтигэр уус-уран быыстапкаларга кыттан лауреат, дипломант буолаллар. Итини мин бэйэм кыра ситиһиибинэн ааҕынабын. Дьарыкпын 2006 сылтан саҕалаабытым. Улууска норуот маастарын аатын 2009 с. ылбытым, оттон 2015 с. «СӨ норуотун маастара» үрдүк ааты сүгэр чиэстэммитим.

Инниктин даҕаны матырыйааллары булан дьарыктанар былааннаахпын. Туостан араас оҥоһуктарга ылсан үлэлиир баҕа санаалаахпын. Туостан оҥоойуктары, шкатулкалары оҥоруохпун баҕарабын.

Вера Санникова , СӨ норуотун маастара, Россия худуоһунньуктарын сойууһун чилиэнэ, Мэҥэ Хаҥаластан төрүттээх, Дьокуускай олохтооҕо:

-Иистэнньэҥмин, сахалыы төрүт үгэс (традиционнай) буолбут таҥаһы-сабы тигэбин уонна айылҕа (натуральнай) таастарыттан араас хартыыналары оҥоробун. Үлэлиир хайысхам, интэриэһим элбэх. Кылынан, муоһунан, маһынан дьарыктанабын. Сувенирдары оҥорууттан саҕалаан дьарыктаммытым ыраатта. Идэбин өссө да сайыннарар, иистэнэр, уһанар былааннаахпын.

Федор Скрябин , мас ууһа, Хорообут нэһилиэгэ:

-Маһынан иһити-хомуоһу оҥоробун. Улууска быыстапкаларга кыттабын. Норуот маастара буолбутум. Сайынын биригээдэ тэринэн ыһыах ыытыллар сирдэригэр тутуунан дьарыгырабын. Уһаныынан дьарыктаммытым ыраатта 40-ча сыл буолла. Олохтоох оскуолаҕа 13 сыл куруһуок салайааччытынан үлэлээбитим. Билигин аҕыйах эдэр ыччаты дьарыктыы сылдьабын.

Салгыы Өрөспүүбүлүкэ да, улуус да таһымнаах быыстапкаларга кыттар уонна нэһилиэкпэр саҥаттан мастарыскыай тэринэн, ыччаты түмэн дьарыктанар былааннаахпын.

Валентина Саввинова – Оһуордаах , Тараҕай нэһилиэгиттэн төрүттээх, Дьокуускай олохтооҕо, норуот маастара:

-Оҕуруонан быысапкалыыбын. 2000 сылтан утумнаахтык үлэлиибин. Ыытыллар тэрээһиннэргэ кыттабын. Үлэлэрим улуустарга, Россияҕа, тас дойдуларга быыстапкаларга туруоруллубуттара. Быйыл улууспутугар уус сыла биллэриллибитинэн улахан үлэни оҥорон оройуон пуондатыгар туттарыахпын баҕарабын. «Симэх» галерея үбүлүөйдээх 25 сылыгар эмиэ анал үлэбин саҕалаатым.

Савва Левин , көмүс ууһа, тараҕай нэһилиэгэ:

-Ювелир идэлээхпин уонна тимиринэн уһанабын. Быһах, кур, сахалыы симэх, эр киһи харысхалын оҥоробун. 2003 с. Дьокуускайдааҕы технология уонна дизайн коллеһын бүтэрбитим. 2004 – 2005 сылтан саҕалаан уус быһыытынан дьарыгырабын. Билигин икки оскуола үөрэнээччилэрин уонна ыччаттары баһылаабыт хайысхабар уһуйа сылдьабын. Ыччаттар олус баҕалаахтар. Быйыл сөптөөх тэриллэри ылынан, «Уус дьиэтэ» мастарыскыайы арынар баҕалаахпын. Араас бырыайыактар куонкурустара билигин элбэхтэр, онно киирсэн, холонон предприниматель буолар ыра санаалаахпын.

Хас биирдии нэһилиэк талааннаах, дьарыктаах дьонноох. Кинилэр сүрүннээн саха норуотун үгэс буолбут ньымаларыгар олоҕуран иистэнэллэр, быысапкалыыллар, муостан, туойтан, тимиртэн, кылтан – сиэлтэн, туостан, түүлээхтэн, кыһыл-үрүҥ көмүстэн оҥоһуктарга сүрүн болҕомто уурулунна.

1 из 9

 

 
По теме
Семен Филиппов освобождён от занимаемой должности - ИА SakhaTime Директор Управления автомобильных дорог РС(Я) Филиппов Семён освобождён от занимаемой должности на основании распоряжения председателя правительства Бычкова Кирилла от 29 марта, пишет Торбозное радио.
ИА SakhaTime
Вилюйский район: Совместные рейды с МТПК - Противопожарная служба Пожарные и инструкторы противопожарной профилактики ОГПС РС(Я) №15 по МО «Вилюйский улус (район)» активно проводят инструктажи по пожарной безопасности.
Противопожарная служба
Названы лауреаты премии «Күн Өркөн» - ИА SakhaLife.Ru XXXI гала-концерт колледжа культуры и X I церемония вручения премии «Күн Өркөн» 28 марта 2024 г. в Якутске состоялся гала-концерт студентов Якутского колледжа культуры и искусств им.
ИА SakhaLife.Ru
Фотофакт: Историк Пантелеймон Петров на открытии выставки со своей первой учительницей - ИА SakhaLife.Ru Кандидат исторических наук Пантелеймон ПЕТРОВ со своей первой учительницей Варварой Сергеевной ЗВЕРЕВОЙ на открытии своей выставки, посвященной 75-летию учёного, эксперта по истории города Якутска.
ИА SakhaLife.Ru
В Якутске состоялся I Открытый конкурс исполнителей на кылыһах кырыымпе - Министерство культуры        28 марта с.г. состоялся I Открытый конкурс исполнителей на кылыһах-кырыымпе, посвящённый 10-летию ансамбля якутских инструментов "КЫЛ САХА" Национального театра танца РС (Я) им.
Министерство культуры