Бэҕэһээ Үөһээ Бүлүү улууһугар Ил Дархан эбээһинэһин толорооччу Айсен Николаев салайааччылаах бөлөх олохтоох нэһилиэнньэни кытта көрсөн, оройуон социальнай-экэнэмиичэскэй сайдыытын боппуруостарын тула кэпсэттилэр. Оробуочай бөлөх састаабыгар Бырабыыталыстыба бэрэссэдээтэлин бастакы солбуйааччыта Алексей Колодезников, Тыа хаһаайыстыбатын миниистирин эбээһинэһин толорооччу Александр Атласов, СӨ экологияҕа, айылҕаны туһаныыга уонна ойуур хаһаайыстыбатыгар миниистирэ Сахамин Афанасьев о .д.а. киирдилэр.
Үөһээ Бүлүү улууһун баһылыга Владимир Поскачин улуус билиҥҥи социальнай-экэнэмиичэскэй сайдыытын, туругун туһунан сүрүн дакылаат оҥордо. Салгыы олохтоохтор улуус сайдыытыгар төһүү күүһүнэн буолар боппуруостары туруорустулар, этиилэри оҥордулар. Ол курдук олохтоохтор тыа хаһаайыстыбатын боппуруоһугар оттуур ходуһаны оҥорууга болҕомтону ууран, мелиорацияны күүскэ ыытары, сылгыны элбэтиигэ болҕомто ууруллуохтааҕын эттилэр.