Нам: арыгыны бобууга санаа хайдыһыыта баар

Нам: арыгыны бобууга санаа хайдыһыыта баар
Нам: арыгыны бобууга санаа хайдыһыыта баар
Нам: арыгыны бобууга санаа хайдыһыыта баар
Нам: арыгыны бобууга санаа хайдыһыыта баар
Нам: арыгыны бобууга санаа хайдыһыыта баар
Нам: арыгыны бобууга санаа хайдыһыыта баар
Нам: арыгыны бобууга санаа хайдыһыыта баар
Нам: арыгыны бобууга санаа хайдыһыыта баар
Нам: арыгыны бобууга санаа хайдыһыыта баар
Нам: арыгыны бобууга санаа хайдыһыыта баар
Фото: iltumen.ru
Ахсынньы 6 күнүгэр Ил Түмэн олохтоох бэйэни салайыныы боппуруостарыгар уонна экэниэмикэҕэ, инвестицияҕа, бырамыысыланнас бэлиитикэтигэр, урбааҥҥа, туризмҥа уонна инфраструктура сайдыытыгар сис кэмитиэттэрин бэрэссэдээтэллэрэ Намҥа тахсан нэһилиэнньэни кытта көрүстүлэр.   Нэһилиэк мунньаҕар Ил Түмэн олохтоох бэйэни салайыныы боппуруостарыгар сис кэмитиэтин бэрэссэдээтэлэ Василий Местников , экэниэмикэҕэ, инвестицияҕа, бырамыысыланнас бэлиитикэтигэр, урбааҥҥа, туризмҥа уонна инфраструктура сайдыытыгар сис кэмитиэт бэрэссэдээтэлэ Виктор Федоров , норуот депутата Николай Румянцев , «Трезвая Якутия» хамсааһын уопсастыбанньыга Елена Щудря кыттыыны ыллылар.   Нэһилиэнньэни кытта көрсүһүү төрүөтүнэн Нам сэлиэнньэтин сиригэр-уотугар итирдэр утаҕы атыылыыры бобор туһунан» сокуону көҕүлээһин буолла. Тустаах сокуон барылын нэһилиэк Сэбиэтэ муус устар ыйга Ил Түмэн көрүүтүгэр бэлэмнээн киллэрбит.    Киэһэ 19:00 чаастан кулууп дьиэтигэр буолбут көрсүһүүгэ нэһилиэнньэ актыбыыстара мустубуттар. Мунньаҕы Нам нэһилиэгин баһылыга Андрей Новгородов иилээн-саҕалаан ыытта.   Эҥсиэли хочотугар турар Ленскэй нэһилиэгэ – Нам улууһун киинэ. Дьокуускайтан 84 км тэйииччи сытар. Нэһилиэнньэтин ахсаана - 12 тыһ. кэриҥэ киһи. Нам улууһун састаабыгар барыта 19 муниципальнай тэриллии киирэр эбит буоллаҕына, онтон 8 муниципальнай тэриллии 13 нэһилиэнньэлээх пуунун сиригэр-уотугар итирдэр утаҕы атыылыыр СӨ сокуонунан бобуллубут.      Кулун тутарга Ленскэй нэһилиэгин депутаттарын Сэбиэтин сессията буолбут. Уопсайа 15 депутат баарыттан биир депутат сессияҕа кэлбэтэх. Мунньахха нэһилиэккэ арыгыны атыылыыры толору бобор туһунан кэпсэтии тахсыбыт. Ити этиини 1 депутат утарбыт, уоннааҕылар өйөөбүттэр.   Санатар эбит буоллахха, Ил Түмэн уочараттаах ХII пленарнай мунньаҕар «Саха Өрөспүүбүлүкэтигэр итирдэр утахтары биирдиилээн атыылааһын бириэмэтигэр, усулуобуйатыгар уонна миэстэтигэр эбии хааччахтааһыны олохтуур туһунан» сокуон барыла бүтэһиктээх ааҕыыга ылыллыбыта. Тустаах докумуоҥҥа олоҕуран, нэһилиэктэр Сэбиэттэрэ бөһүөлэктэригэр итирдэр утаҕы атыылааһыны бобор туһунан бэйэлэрин сокуону көҕүлээһиннэрин өрөспүүбүлүкэ парламеныгар киллэрэр толору бырааптаахтар. Ити бырааптарын туһанан, Ленскэй нэһилиэгин Сэбиэтэ муус устар ыйга Ил Түмэҥҥэ «Ленскэй нэһилиэгэ» МТ Нам сэлиэнньэтин сиригэр-уотугар итирдэр утаҕы атыылыыры бобор туһунан»   сокуону көҕүлээһини бэлэмнээн киллэрбит. Бэлиэтээн эттэххэ, ити оройуон киинигэр арыгыны атыылыыры   толору бобор туһунан Ил Түмэҥҥэ киирбит аан бастакы көҕүлээһин буолар.   Балаҕан ыйын 10 күнүгэр нэһилиэккэ быһаччы ити боппуруоска сыһыаннаах аһаҕас истии буолбут, онно уопсайа 34 киһи кыттыыны ылбыт. Ити сыыппараны олус соһуйа иһиттим. Сэбиэт депутата Вера Попова этэринэн, олохтоохтор мунньахтарга, бэл, баһылык отчуотугар аанньа кэлбэттэр эбит. Итирдэр утаҕы атыылааһыны бобору төһө киһи өйүүрүн билэр сыалтан нэһилиэнньэ ортотугар анал ыйытык ыытыллыбыт. Онно барыта 1907 киһи кыттыбытыттан 1867 киһи өйүүрүн биллэрбит, оттон 47 киһи тустаах көҕүлээһини утарбыт.   Норуот депутата Василий Местников итирдэр утаҕы атыылыыры хааччаахтыыр сокуон Саха сиригэр эрэ баарын бэлиэтээн эттэ. Омуннаабакка эттэххэ, кэнники кэмҥэ Ил Түмэн хас пленарнай мунньаҕын аайы парламентарийдар итинник ис хоһоонноох уончалыы сокуону ылыналлар. Өрөспүүбүлүкэ олохтоохторо аһыы утах буортутун, содулун өйдөөн эрэллэрэ киһини үөрдэр.   Арааһа, Россия ханнык да регионугар арыгылааһыны утары маннык сокуоҥҥа олоҕурбут үлэ ыытыллыбат буолуохтаах. «Саха сиригэр чөл олох туһугар охсуһуу үлэтэ саҕаламмыта ыраатта. Өрөспүүбүлүкэбит биир улахан улууһун кииниттэн итирдэр утаҕы атыылыыры толору бобор туһунан сокуону көҕүлээһин киирбитигэр, миэстэтигэр тиийэн олохтоохтору кытта көрсөн, ити боппуруоһу иһиттэн үөрэтэн көрөргө быһаарыммыппыт. Онон бүгүн эһиги тылгытын-өскүтүн, санааҕытын истэ кэлэн турабыт», -   диэтэ Василий Местников нэһилиэнньэҕэ туһаайан. Өрөспүүбүлүкэ бар дьонун депутаттара олохтоохтору бүгүҥҥү мунньахха улуус киинигэр итирдэр утаҕы атыылыыры толору бобуу үтүө өрүттэрин уонна итэҕэстэрин-быһаҕастарын толкуйдаан көрөргө ыҥырдылар. Кистэл буолбатах, аһыы утаҕы кистээн атыылааһын түбэлтэтэ сир аайы баар.   Олохтоохтор истэриттэн тыл этээччилэр биир-биир туран аһыы утах уопсастыбаҕа аҕалар содулларын, иһээччи төрөппүттэрдээх оҕолор төһөлөөх эрэйдэнэллэрин олохтон ылан холобурдаатылар, арыгылааһыны утары үлэни хайдах гынан көдьүүстээхтик ыытыахха сөбүн туһунан санааларын үллэһиннилэр. Ол эрэн, итиннэ сорохтор утарылаһар санаалаахтарын биллэрдилэр.   Урбаанньыт Валерий Тимофеев , өскөтүн итирдэр утах атыыта бобулуннаҕына, таксистар Дьокуускай куораттан тиэйэн аҕалан икки-үс бүк ыарахан сыанаҕа атыылыахтара диэн сэрэхэдийэрин биллэрдэ. Билигин даҕаны сорох таксистар водканы 500 солк. атыылыыллар үһү.   Кини кистээн атыылааһынтан туох да нолуок төлөммөтүн, ону таһынан куһаҕан хаачыстыбалаах арыгыны атыылаан өссө улахан иэдээни оҥоруохтарын сөбүн ыйда. Урбаанньыт хас биирдии киһи аһыы утаҕы иһэрин-испэтин бэйэтэ быһаарыныахтааҕын эттэ.   Арыгы маркетын атыыһыта Марианна Протопопова урукку сылларга тэҥнээн көрдөххө, иһээччи ахсаана   40-50%   аҕыйаабытын эттэ. Кини былырыын Намҥа түөрт ый устата арыгы маҕаһыыннара сабылла сылдьыбыт кэмнэригэр эдэр киһи техническэй испиири иһэн суорума суолламмытын санатта. Биир саастаах киһи туран арыгыны атыылыыры боппокко эрэ, урукку курдук ЛТП сөргүтүөххэ наада диэн бэйэтин санаатын эттэ. «Мас икки уһуктаах дииллэринии, эмискэ бобон кэбиһэн, өссө улахан иэдээни оҥоруохпутун сөп. Мин кэтээн көрөрбүнэн, билиҥҥи ыччат бэрээдэгэ биллэ тупсубут, чөл олоҕу өрө тутааччы дьон ахсаана элбээтэ», - диэн эбэн эттэ.   Чөл буолуу уопсастыбатын бэрэссэдээтэлэ, социальнай-реабилитационнай киин дириэктэрэ Любовь Маркова : «Эһиги арыгы содулуттан төрөппүт көрүүтэ суох хаалбыт оҕолор харахтарын уутун көрө иликкит...Бэйэбит эрэ туспутунан санаабакка, кэлэр кэскилбит чөл туруктаах буоларын туһугар арыгыттан аккаастаныахха!» - диэн биир дойдулаахтарын ыҥырда. Итини таһынан урбаанньыттар арыгыны атыылаан буолбакка, атын туһалаах табаары, бородууктаны атыылаан дохуоттаналлара наадатын эттэ.   Бу сыллар тухары чөл олох хамсааһыныгар актыыбынайдык үлэлэһэ сылдьар Елена Щудря орто дойдуга кэлэр киһи барыта чэбдик өйдөөх-санаалаах төрүүрүн  санатта. Кини  арыгылаах бородууксуйа уонна наркотическай эттиктэр сабыдыалларын түмүгэр төһөлөөх элбэх ыарыһах, доруобуйалара эмсэҕэлээбит   оҕо күн сирин көрөрүн холобурдаата.   Нэһилиэк олохтооҕо Анна Шапошникова арыгыны сокуонунан бобон, хааччахтаан кэбиһэр уустугун эттэ. Кини хас биирдии киһи өйүгэр-санаатыгар арыгы буортутун туһунан ырытан, толкуйдаан, иһэртэн аккаастаныан наадатын, оччоҕо эрэ алдьархайы үөскэтэр аһыы утаҕы кыайыахпыт диэн бэйэтин санаатын биллэрдэ.   Нэһилиэк депутаттарын Сэбиэтин бэрэссэдээтэлэ Александр Кириллин : «Аан дойдуга буолар алдьархай, сидьиҥ быһыы-майгы төрүөтэ – итирдэр утах. Улуус атын нэһилиэктэригэр арыгыны хааччахтыыр сокуоннар ылыллан үтүө дьайыылары номнуо көрдөрөн эрэллэр». Итини таһынан кини Саха сиригэр арыгы бордууктатын тоҕо «Олоҥхо», «Орто дойду», «Кэскил», «Дархан» диэн ааттыылларыттан нэһилиэнньэ сонньуйарын иһитиннэрдэ. Уонна соторутааҕыта үтүө санаалаах Антон Васильевка улахан ситиһиитинэн «Дархан» водканы бэлэх ууммуттарын санатта. Нэһилиэк Сэбиэтин бэрэссэдээтэлэ Ил Түмэн депутаттара кинилэр көҕүлээһиннэрин өйүөхтэригэр эрэнэрин эттэ.   Түмүккэ олохтоохтор «Индрайвер» нөҥүө уонна сокуоннайа суохтук итирдэр утаҕы атыылыыр дьону кытта күүскэ үлэлэһиэххэ наада диэн санааҕа кэллилэр.   Норуот депутаттара нэһилиэнньэ санаатын истэн баран, туһааннаах боппуруос  ахсынньы 12 күнүгэр Ил Түмэн экэниэмикэҕэ, инвестицияҕа, бырамыысыланнас бэлиитикэтигэр, урбааҥҥа, туризмҥа уонна инфраструктура сайдыытыгар сис кэмитиэтин мунньаҕар көрүллүөҕүн эттилэр. Сокуон барыла ахсынньы 20-21 күннэригэр Ил Түмэн XXVI пленарнай мунньаҕын бэбиэскэтигэр киллэриллиэхтээх.        Мария ПАВЛОВА, «Ил Түмэн» хаһыат корреспондена.     Александр Тарасов хаартыскалара.      
 
По теме
По поручению прокуратуры республики прокуратура г. Якутска провела проверку по размещенной в сети «Интернет» информации о недостаточном оснащении ГАУ РС (Я) «Поликлиника № 1» медицинскими изделиями.
Офицерам из Якутии вручены медали «Золотая Звезда» Героев Российской Федерации - Глава Республики Министр обороны России, генерал армии Сергей Кужугетович Шойгу сегодня вручил нашим землякам – майорам Игорю Юргину и Николаю Соболеву высшие государственные награды страны —золотые Звезды Героев Российской Федерации!
Глава Республики
Семен Филиппов освобождён от занимаемой должности - ИА SakhaTime Директор Управления автомобильных дорог РС(Я) Филиппов Семён освобождён от занимаемой должности на основании распоряжения председателя правительства Бычкова Кирилла от 29 марта, пишет Торбозное радио.
ИА SakhaTime
Вилюйский район: Совместные рейды с МТПК - Противопожарная служба Пожарные и инструкторы противопожарной профилактики ОГПС РС(Я) №15 по МО «Вилюйский улус (район)» активно проводят инструктажи по пожарной безопасности.
Противопожарная служба
Названы лауреаты премии «Күн Өркөн» - ИА SakhaLife.Ru XXXI гала-концерт колледжа культуры и X I церемония вручения премии «Күн Өркөн» 28 марта 2024 г. в Якутске состоялся гала-концерт студентов Якутского колледжа культуры и искусств им.
ИА SakhaLife.Ru
Фотофакт: Историк Пантелеймон Петров на открытии выставки со своей первой учительницей - ИА SakhaLife.Ru Кандидат исторических наук Пантелеймон ПЕТРОВ со своей первой учительницей Варварой Сергеевной ЗВЕРЕВОЙ на открытии своей выставки, посвященной 75-летию учёного, эксперта по истории города Якутска.
ИА SakhaLife.Ru