Акыымап диэн — Акыымап

Акыымап диэн — Акыымап
Акыымап диэн — Акыымап
Акыымап диэн — Акыымап
Акыымап диэн — Акыымап
Фото: sakhalife.ru

«Биир ньыгыл Россия» праймериһа быйыл бэйэтэ быыбар кэриэтэ көхтөөхтүк бара турар. Сунтаар улууһугар партия испииһэгинэн кытта сылдьар сенатор Александр АКИМОВ көрсүһүүлэригэр дьон күргүөмүнэн сылдьар, дойду сокуону оҥорор уонна бигэргэтэр үрдүкү уорганыгар үлэлии сылдьар биир дойдулаахтарыттан ыйыталлара, толору хоруйу эрэйэллэрэ үгүс: пенсия кээмэйэ тоҕо кыратыттан саҕалаан ааспыт быыбардар түмүктэригэр; Сунтаар улууһун күннээҕи олоҕун эридьиэстэриттэн сайдар саҕахтарын сабаҕалааһыҥҥа тиийэ. Манна Акимовы Тойбохой сопхуос үлэтин өрө көтөҕөн төлөннүрэ сылдьар кэмиттэн билэр ытык саастаах дьонтон — кини өҥөтүнэн Сунтаарга ыытыллыбыт Спортивнай Оонньууларга тутуллубут түһүлгэлэргэ эрчиллэн, чэгиэн-чэбдик олох суолун тутуһан улааппыт эдэр дьон бары бааллар.

Сунтаардар сайдыыттан хаһан да хаалбаттар. Төһө да интернет ситимэ эриэ-дэхси буолбатаҕын иһин, олохтоохтор Федерация Сэбиэтин сайтыгар киирэллэрэ, Акимов тыа нэһилиэктэригэр балыыһалар, оскуолалар сабыллыыларын утаран министр Голодеһы кытта хас да төгүллээх киирсиилэрин, босхо гектар сокуонуттан Саха сирин таһаарарга туруммут киирсиитин, аччыгый уонна орто бизнескэ энерготарифтар намтыылларын ситиспитин, хотугу коэффициент туһугар этиилэрин, хотугу сир тыытыллыбат иэнэ кэҥииригэр үлэтин туһунан истэн-билэн олороллоро, Валентина Матвиенко сенатор актыыбынаһын хаста бэлиэтээбитин кытта  аахпыттара үөрдэр.

Сорохтор «Күүкэйгэ эрэ тутууну ыыттыҥ» — диэн буруйдуу саныыр эбиттэр. Онуоха сенатор: «Күүкэй оскуолата уонча эрэ оҕолоох хаала сылдьыбыта. Таас оскуола тутуллубутун кэннэ билигин үөрэнээччитин ахсаана сүүстэн таҕыста. Мин «кэскилэ суох нэһилиэк» диэн суоҕун дакаастыы сатыыбын, өбүгэбит кэриэс хаалларбыт сирин-уотун кэҕиннэрбэт иэстээхпитин өйдөтө сатыыбын. Күүкэйгэ төрөппүттэрим өтөхтөрүн сөргүтэн, дьиэлэрин-уоттарын саҥардан, хонон-өрөөн барабын. Хас биирдии нэһилиэктэн киэҥ ыырдаммыт дьон бааллар. Ол дьоҥҥо холобур буола сатыыбын. Онтон улуус атын тутууларыгар кыһамньым туһунан дьаһалта үлэһиттэриттэн истээриҥ. Ыытыллар тутууга барытыгар кэриэтэ сыһыаннаахпын, кэпсэтиитин, докумуона хаамыытын тус хонтуруолбар тутан кэллим…» — диир.

Кырдьык, Александр Константинович Москваҕа үлэлиибин диэн бу сылларга кинилэртэн тэйбэккэ, төттөрүтүн, өссө ыкса ситими тутуһан, улуус дьаһалтатын кытта биир сүбэни булан үлэлээбит буолан, төрөөбүт улууһун сайдыытын тула кэпсэтиилэри бэрт сэргэхтик ыытар.

Кини сонун толкуйунан Кэппэндээйигэ, Устьеҕа кииннээн тэриллиэхтээх ТОСЭР — Сунтаар улууһун кэскилин хааччыйар тэрилтэ буолуо. «ТОСЭР — нолуок чэпчэтиитинэн  туһанар кыаҕы биэрэр, онон олохтоох оҥорон таһаарар тэрилтэлэрбитин сайыннарар, атахтарыгар туруорар кыаҕы мүччү тутуо суохтаахпыт. Биһиги буолбатаҕына, кэлии хампаанньалар бу түгэни туһаналлара эрэбил», — диир сенатор. Манна бэлэмнэнии быһыытынан, Устьены сөптөөх энергиянан хааччыйар трансформатор туруутун Александр Акимов туруорсан киллэттэрдэ.

Улуус сиригэр-уотугар улахан хостуур хампаанньалар үлэлэрин саҕалаан эрэллэрэ бүгүн күннээххэ олохтоохтору долгутар сүрүн түгэн. Бу хампаанньалары кытта тэҥҥэ аахсар дьон депутат буолуохтаахтар диэн дьон сөпкө өйдүүр. Александр Акимов хостуур хампаанньа салалтатын кытта эдэр эрдэҕиттэн алтыспыт, ханна доҕордуу сыһыанынан, ханна остуолу тоҥсуйан санаабытын ситиһэр идэлээҕэ номоххо сылдьар. Онон «Акыымаппыт  тас да көрүҥүнэн сабырыйар, чыынын-хаанын да таһымынан сүрдэрин баттыыр кыаҕа тыын суолталаах буолла. Акыымап диэн — Акыымап» — диир киһи элбэх.

Источник: Федерация чилиэнин пресс-сулууспата.
 
По теме
Спасатели выехали на участки возможного схода снежных лавин - ИА SakhaLife.Ru Спасатели аэромобильного поисково-спасательного подразделения Службы спасения республики 28 марта выехали из Якутска в Томпонский район для обеспечения безопасности на участках возможного схода снежных масс.
ИА SakhaLife.Ru
4.jpg - Мирнинский район В 2023 году на территории Якутия зарегистрировано 123 дорожно-транспортных происшествия с участием несовершеннолетних, в результате которых 1 ребенок погиб, 139 детей получили травмы.
Мирнинский район
В медицинскую часть исправительной колонии № 1 поступило новое медицинское оборудование - УФСИН России по Республике Саха (Якутия) В рамках модернизации филиалов медико-санитарной части № 14 ФСИН России, расположенных в исправительных учреждениях УФСИН России по Республике Саха (Якутия),
УФСИН России по Республике Саха (Якутия)